أخبار الرياضة

أخبار الرياضة من لبنان

٢٥-٠٩-٢٠٢٤

"لوين يا مروان عا مهلك"، قللي يا مروان مين بدك تشيل حتى تقعد محلو؟ على قول زياد الرحباني، "ما الغالبية اخوة واخوات بس لحد هلق ما قالولنا اخوة شو واخوات شو"، فأعضاء الاتحادات الرياضية الناشطين فيهم "الخير والبركة" ومنرفعلن القبعة، لكن أخبرنا حضرتك ليش كل أربع سنين، أي بعد انتهاء كل دورة أولمبية بتصير حسود وحشور؟!

ما لقيت عندك طموح لغير هالمصلحة، ما هي خدمة مش ربيحة ومش للكنفشة، يعني انت طامح تصير عضو، بس ما قلت عضو لاي منصب؟ وشو فيك تعمل أكتر من غيرك؟

إنت شفت شو عِمِل غيرك لخدمة اللعبة، هل نشاطاتك عمّت كل الوطن متلو أو إقتصرت على ضيعتك وجوارها؟ عندك فريق ناجح، وغيرك كمان عندو فريق ناجح، إنت شبّ حلو وهني كمان ما بيشكو من شي، إيه روح شفلك شي إتحاد أو نادي غافي وساعدو بلكي بتوعى إنت وياه، هيك هيك إنتو "سويعاتية" بتحبو الرياضة على ذوقكن.

هلق خلص المزح وبلش الجد، سأتلوا عليكم كيف يفكر ويتمنّى جراميز الحسّاد، وأكيد على طريقتهم، وهذه إحدى أدعيتهم الباطنية ينعتونكم بقولهم:"بُليتم بمرَض يُبعدكم عنّا، أنزل الله عليكم عاصفة تهدّكم، ويغلق في وجهكم أبواب الرزق والسعادة، تطلّون علينا كل يوم نافخين بطونكم لا يعرف الطول منكم من العرض، تتمخضون بكلمات أقسى من وخز الإبر، وتحدّقون بعينين ملتهبتين بكبريت الحقد والضغينة، إيه والله، عجز الخلد ان يسمع ما تسمعون، والببغاء ان يردد ما تحفظون، طواويس إداريين تدّعون العلم والمعرفة والأخلاق وأنتم لا تليقون إلا على الخطابة على منبر الشهرة.

هيك بدكن يقولوا عنكم حتى يقعدو محلكن؟ روحو، كل واحد يعمل شغلة تفيد الرياضة، ومن أول الدرب يعرف وزن فكرو وكم يساوي، وتكون امكاناتو اكبر من طموحاتو، والعبرة مش وزن جيبتو أو بطنو وتنظيراتو، العبرة في العطاء المنتج للقطاع الرياضي! عبدو جدعون